IOSH “Təhlükəsiz İdarəetmə” təlim kursunu uğurla başa vuran dinləyicilər beynəlxalq sertifikatlarla təmin olunurlar

SOCAR-ın Xəzər Təlim və Sertifikatlaşdırma Mərkəzində (CTCC) IOSH (Institution of Occupational Safety and Health – Əməyin Mühafizəsi və Sağlamlıq İnstitutu) tərəfindən akkreditasiyalı “Managing Safely V5.0 – Təhlükəsiz İdarəetmə” təlim kurslarının keçirilməsi uğurla davam etdirilir.

Dörd günlük təlim proqramı əsasən menecerlər, supervayzerlər, SƏTƏM sahəsində çalışan əməkdaşlar, eləcə də SƏTƏM sahəsi ilə maraqlanan və bu istiqamətdə bilik və bacarıqlarını artırmaq istəyən şəxslər üçün nəzərdə tutulub. Kurs iştirakçıların əməyin mühafizəsi və təhlükəsizlik məsələlərinin effektiv idarə edilməsi, iş yerində mövcud təhlükə və risklərin müəyyənləşdirilməsi, qiymətləndirilməsi və onlara nəzarət tədbirlərinin tətbiqi üzrə bilik və praktiki bacarıqlarının inkişaf etdirilməsinə yönəlib.

Təlim proqramı aşağıdakı yeddi əsas moduldan ibarətdir:

• Modul 1: Təhlükəsiz idarəetməyə giriş;
• Modul 2: Risklərin qiymətləndirilməsi;
• Modul 3: Risklərə nəzarət edilməsi;
• Modul 4: Məsuliyyətlərin bölüşdürülməsi;
• Modul 5: Təhlükələrin müəyyənləşdirilməsi;
• Modul 6: Hadisələrin araşdırılması;
• Modul 7: Performansın ölçülməsi.

Təlim müddətində iştirakçılara SƏTƏM sahəsi üzrə nəzəri biliklərlə yanaşı, real iş situasiyaları və nümunəvi case-lər əsasında risklərin qiymətləndirilməsi və idarə olunması üzrə praktiki tapşırıqlar təqdim edilir. Bu yanaşma əldə olunan nəzəri biliklərin praktiki tətbiqinin möhkəmləndirilməsinə imkan yaradır.

Təlimin sonunda iştirakçılar həm nəzəri, həm də praktiki tapşırıqları müvəffəqiyyətlə yerinə yetirdikləri təqdirdə IOSH tərəfindən verilən beynəlxalq sertifikatla təmin olunurlar.

Hazırda CTCC-də IOSH “Managing Safely V5.0” təlim proqramının keçirilməsi davam etdirilir. Təlimin təşkili SƏTƏM sahəsində çalışan əməkdaşların, menecerlərin, supervayzerlərin və bu sahədə biliklərini inkişaf etdirmək istəyən şəxslərin təhlükəsizliyin idarə olunması üzrə bilik və praktiki bacarıqlarının artırılmasına, müasir beynəlxalq yanaşmaların iş prosesində tətbiqinə xidmət edir.