CTCC Böyük Britaniyanın LEEA qurumu tərəfindən Takelajçılar üçün “Takelaj və Qaldırma” səviyyə 1 təliminə tam hüquqlu akkreditasiya əldə etmişdir

SOCAR-ın Xəzər Təlim və Sertifikatlaşdırma Mərkəzinin daha bir mühüm beynəlxalq nailiyyəti

CTCC Böyük Britaniyanın Lifting Equipment Engineers Association (LEEA) tərəfindən “Rigging and Lifting” Level 1 təliminin keçirilməsi üzrə tam hüquqlu akkreditasiya əldə edib.
Bununla əlaqədar olaraq, “Rigging and Lifting” Level 1 təlimi LEEA-nın təlim portalında artıq aktivləşdirilib və CTCC-də beynəlxalq standartlara uyğun şəkildə keçirilməsinə başlanılıb.

Üç iş günü davam edən təlim proqramı 2 gün nəzəri hazırlıq, 1 gün isə praktiki məşğələlər və imtahandan ibarətdir. Təlim çərçivəsində iştirakçılar takelaj və yükqaldırma əməliyyatlarının təhlükəsiz və düzgün icrası üçün zəruri nəzəri bilik və praktiki bacarıqlar əldə edirlər.

Təlim LEEA tərəfindən təsdiqlənmiş Təlimçi və Qiymətləndirici Yaşar Quluyev tərəfindən keçiriləcək. Hər təlim qrupunda maksimum 8 iştirakçı nəzərdə tutulur ki, bu da praktiki məşğələlər zamanı hər bir iştirakçıya daha effektiv hazırlıq imkanı yaradır.

Əldə edilmiş akkreditasiya sayəsində yükqaldırma və takelaj əməliyyatlarında çalışan mütəxəssislər beynəlxalq səviyyədə tanınan LEEA standartlarına uyğun təlim keçmək və müvafiq qiymətləndirmədən uğurla keçərək beynəlxalq sertifikat əldə etmək imkanı qazanırlar.

Bu nailiyyət CTCC-nin yükqaldırma, takelaj və əməyin təhlükəsizliyi sahəsində beynəlxalq standartlara uyğun peşəkar təlimlərin təşkili istiqamətində fəaliyyətinin daha da genişləndirilməsi baxımından mühüm addımdır.

CTCC kollektivini bu mühüm nailiyyət münasibətilə təbrik edir və qarşıdakı fəaliyyətində yeni uğurlar arzulayırıq!